Хамрын ханиад хүрсний шинж тэмдгийг бараг хүн бүхэн мэдэх байх, хамаг бие шархирч өвдөнө, хамраас шингэн нус гоожино, хоолой өвдөж, найтаасны улмаас нүд бүлцийж нулимс гоождог. Тиймээс ханиадыг хүндрэхээс нь өмнө эртхэн зогсоох хэрэгтэй.

Хамрын ханиад нь олон төрлийн нянгаар үүсгэгддэг учир бидний организмд түүний эсрэг тогтмол дархлаа байдаггүй, ханиадны эсрэг нэг ч вакцин зохион бүтээгдээгүй. Тийм ч учраас хүмүүс бүхий л амьдралынхаа туршид ханиад туссаар байдаг.

Ханиадны эсрэг эм бэлдмэл олон бий, гэхдээ тэд бүгд л парацетамол болон түүнтэй төстэй эмний хүчээр халуун буулгах, амин дэм С-гийн тусламжтайгаар дархлаа дэмжих үйлчилгээтэй байдаг.

Гэхдээ уламжлалт аргаар дөнгөж эхэлж байхад нь эмчилж болох байтал бие организмыг химийн бодисоор хордуулаад яах юм бэ. Ханиадтай тэмцэхэд хамгийн гол нь биеийн дархлааг сайжруулах хэрэгтэй.

Ингээд хамрын ханиад дөнгөж хүрсэн даруйд зогсоох дараах хэдэн зөвлөгөөг толилуулж байна. 
1. Ханиадны эхний шинж тэмдэг илрэнгүүт ядаж ганц өдөр гэртээ өнжиж хагас хэвтрийн дэглэм баримтлахыг хичээх нь зүйтэй. Өвчний эхний үед бие организмд амар тайван байдал чухал, тиймээс болж өгвөл сайтар унтаж амрах хэрэгтэй.
2. Дархлаа дэмжих бэлдмэл хэрэглэж дархлааныхаа системийг бэхжүүлэх хэрэгтэй.
3. Ханиадыг эмчлэхэд бүлээн шингэн зүйл их хэмжээгээр уух хэрэгтэй. Энэ нь зөгийн бал юмуу нимбэгтэй цай, аньсны шүүс байвал зүгээр. /Жич зөгийн балыг 40 0 -аас доош хэмтэй бүлээн усанд найруулна/
4. Хамраа давсны уусмалаар угаахаа мартав. Цайны халбагаар тал давсыг нэг аяга буцалсан бүлээн усанд уусгаад 3-4 удаа хамартаа соруулж зайлна.
5. Халуун устай ваннд орох ч тустай. Гэхдээ ханиад дөнгөж эхэлж байгаа үед, тэгээд халуунгүй үед гэдгийг бүү март.
6. Өрөө тасалгаандаа заавал агаар оруул. Ханиад хүрсэн үед цэвэр агаар маш чухал. Агааржуулах үедээ түр өөр өрөөнд орохыг зөвлөе. 
7. Хөлөө аль болох дулаан байлга. 
8. Зөв хоолло. Ханиад хүрсэн үед тахиа болон загасны шөл, шинэхэн жимс, ногоо идэх нь тустай. Хэрвээ таны хоолой хөндүүрлээд юм залгихад хүндрэлтэй байгаа бол жимс ногооны шинэхэн шүүс уугаарай. 
9. Ханиадтай хийх тэмцэлд С амин дэмийн хэрэгцээ ихэсдэг тул түүгээр баялаг хоол хүнс хэрэглээрэй. Жүрж, нимбэг зэрэг жимсэнд энэ амин дэм их хэмжээгээр агуулагддаг. Ханиадтай тэмцэх үед В бүлгийн амин дэмийн хэрэгцээ ч ихэсдэг. Тэдгээр нь бүх төрлийн самранд ихээр агуулагддаг.

Жич: Хамрын ханиад болон томуу, томуу төст өвчнүүдийн эхэн үеийн шинж тэмдэг ойролцоо байдаг, тиймээс илүү тодорхой онош тогтоолгохын тулд мэргэжлийн эмчид хандах нь зүйтэй гэдгийг сануулахад илүүдэхгүй биз ээ.